Aktivitetar frå tidlegare

Oppdatert 15-02-2014

Sogelagsturen 2013
Vestnes sogelag inviterte til heildags busstur laurdag 29. juni. Turen gjekk først ut til Runde, der det var omvisning på Runde miljøsenter og servert varm lunsj. Heimturen gjekk via Eiksundsambandet og den nye Kvivsvegen til Hellesylt, med besøk på Peer Gynt-senteret.

Årsmøtet var tirsdag 19. mars på kommunehuset. Etter årsmøtet var det ope foredrag ved Kaare og Leif Magne Lervik. Her fekk vi høyre om Amerikaturen deira, på leit etter slektningar. Sjå òg artikkel i Årboka for 2012.

Årboka 2012: Årboka for 2012 er blitt godt tatt i mot. Ho er til sal i bokhandelen. Medlemmer får boka tilsendt, inkludert i medlemsskapet.
 

Lokalhistorisk vandring 19. juli
Torsdag 19. juli arrangerte Vestnes sogelag lokalhistorisk vandring. I førehandsomtalen stod:
"På initiativ frå Einar Baltzersen blir Krohg-året utvida for å minnast at det i desse dagar er 150 år sidan sjølvaste Henrik Ibsen vitja bygda vår. På turen oppsøkjer vi nokre av dei plassane Ibsen besøkte då han var her. På ein stad sat han og teikna ei skisse av Tresfjordfjella.
Sjølvsagt skal vi belyse spesielt den feiden som oppsto mellom Ibsen og Krohg i etterkant av besøket. Vi skal også prøve å finne ut om inntrykka frå Vestnes sette spor etter seg i Ibsen si dikting.
Frammøte ved Vestnes Fjordhotell kl. 18.00. Sjå óg hending i fjesboka."
 

Årsmøtet i Vestnes sogelag var 14. mars i rådhuset.
Etter årsmøtet var det foredrag av Per Arne Skomsø om skottetoget for 400 år sidan.
 

Fjellturen til Ysttinden 28. august 2011 i Krohgs fotefar vart offisielt avlyst då vêret ikkje var på vår side. Ei gruppe gjekk likevel til foten av Ysttinden, og Rolf Krohg-Sørensen kjempa seg heilt på toppen, der han framførte tekstar av tippoldefaren. Sjå reportasje i avisene og bilete i  Facebook-gruppa for Krohg-året 2011.

15. mars 2011 var det storslått Krohg-feiring i Vestnes kyrkje under leiing av i Vestnes teaterlag, med Romsdalsorkesteret og Vestnes mandssangforening - det heile verbalt knytt saman av Odd Sørås. Delar av musikken som vart framført står Terje Rypdal bak. Carl Morten Amundsen var instruktør for teaterinnslaga. Etterkommarar av Krohg var med denne kvelden som heidersgjestar. Les meir om feiringa i Vestnes Kyrkjeblad her.

Årsmøte i Vestnes sogelag var  9. mars på kommunehuset med vanlege årsmøtesaker.

Etter møtet kåserte konservator Terje Thingvold på Romsdalsmuseet om Hjertøya, med to forskjellige vinklingar:
      1. Tresfjordingar med tilknytning til Hjertøya
      2. Kunstnaren Kurt Schwitter.
Han viste fleire måleri av Schwitter og fotografi frå Hjertøya på den tida.

På biletet til venstre ser vi Terje Thingvold og Per Bjørn Ellingseter, som vart attvalt som leiar i sogelaget.  Foto JH.
 

18. januar 2011           "Furland-kveld" på Landbruksmuseet.
Bernt Gjelsten på museet inviterte til møte. Guttorm Kjelsvik og Per Bjørn Ellingsseter fortalte den interessante historia om denne grenda frå 1850, om Jacob Jervell, nydyrking, kongebesøk og meir.
 

5. desember 2010        "Kulturvandring" i bilete vart gjennomført på Frostad Grendahus denne kvelden. Tema var handel og næring på strekninga Langneset-Frostad frå gamal til nyare tid. Det var innlegg frå mange med tilknytting til bygda. Oppmøtet var godt, og det var stort engasjement frå salen. Arrangementet var eit samarbeid med Frivilligsentralen.
 

Martin Gjerde fortel

9. september 2010      Vinjekvelden i festsalen på Vestnes sjukeheim vart svært vellykka. Heile 60 tilhøyrarar møtte fram, og vi fekk først smakebitar frå "Ferdaminne frå sumaren 1860" gjennom dramatisering, song, dans og musikk. Skodespelaren Magne Skjævesland framstilte Vinje på ein truverdig måte, godt utfylt av fiolinist og skodespelar Ingeborg Stenerud og pianist Andrea Cvetkovic. Forfattaren Jon Severud har gjennomført ei "gjenreise" i Vinje sine fotefar, 150 år etter. Han viste lysbilete frå ferda, som mellom anna gjekk over Furland i Vestnes, og presenterte smakebitar frå boka. På alle måtar ein triveleg kveld, og sogelaget fekk 4 nye medlemmer! Sjå og: http://www.vinjeproduksjoner.no. PBE.
(Foto: Olav Hole, Vestnesavisa.)

Vinje og Malena, framstilt av Ingeborg Stenerud og Magne Skjævesland
 

20. juni 2010                Sogelagstur til Ishavsmuseet
Det var god deltaking på sogelagsturen, som i år gjekk til Ishavsmuseet på Brandal i Hareid kommune. Med lokal guide i bussen vart vi godt orientert om soga, kulturen og næringslivet i Hareid. Etter felles middag på museet, la vi heimturen via Eiksundsambandet. Det var fyldig reportasje frå turen i lokalavisene. Sjå http://www.ishavsmuseet.no.
 

Frå turen til Ishavsmuseet

7. mai 2010                  Markeringa av frigjeringsdagen
65-årsdagen for frigjeringa vart markert på ein enkel og verdig måte. Ved minnesteinen ved Vestnes kyrkje var det appellar ved major Birger Lilleheim og ordførar Øyvind Uren. Ungdommar frå Helland skule las dikt av Nordahl Grieg. Etterpå vart veteranane innbedne til ei enkel servering på Maritz kafe. Sogelaget samarbeidde med Vestnes kommune og Norske Reserveoffiserers Forbund om dette arrangementet, som samla om lag 15 fornøgde deltakarar.
Les meir her: http://www.rbnett.no/lokal/vestnes/article215257.ece
 

26. april 2010              Nytrykk av to bøker
Sogelaget har fått trykt opp nye opplag av ”Minne frå krigen 1940-1945” og Ivar Brovold si bok ”Smaafortællinger og Sagn”. Desse bøkene har ikkje vore å få på ei tid. Spør etter dei på bokhandelen.
 

9. mars 2010               Årsmøtet 2010 i Vestnes sogelag vart avvikla tysdag 9. mars. 17 medlemmer var til stades. Sjå fullstendig referat frå møtet under Organisasjonen à Møtereferat.

Dei som er med i det nye styret, er desse:

Per Bjørn Ellingseter, leiar, Asbjørn Oterhals, Knut Kjøpstad, Torhill Sellereite og Lars Sigmund Kleive.

Årsmøtet vedtok å auke medlemskontingenten til kr. 220 pr år frå og med 2011.

Ola Gjendem held eit svært interessant foredrag om stell og omsorg av sjuke i eldre tider, med særleg fokus på Reknes spedalskesjukehus og sanatorium.

Av saker som det nye styret kjem til å arbeide med, kan nemnast:

• Sogelagstur på forsommaren til Ishavsmuseet på Brandal

• 150-årsjubileum for Vinje sine ferdaminne i september.

Vi i styret er takksame for innspel frå medlemmene til aktivitetar og turmål.

Leiar Per Bjørn Ellingseter

6. oktober 2009           Museumskveld på Tresfjord museum og Tresheim
Museumskvelden tysdag 6. oktober var eit samarbeidsprosjekt mellom Tresfjord bygdekvinnelag, Tresfjord museum og Vestnes sogelag.
Utstillinga på Tresfjord museum vart godt besøkt.
På Tresheim var det fullt hus, og Bjørn Austigard fengsla tilhøyrarane med det livlege foredraget sitt, hovudsakleg om kuhorn. Spelemannslaget ”Grannelaget” underheld med frisk musikk, leia av veteranen Olav P. Hjelvik.

4. oktober 2009           Kulturminnedagen 2009
Sjølv om veret var dårleg, stilte omlag 30 glade vandrarar opp til lokalhistorisk vandring frå Sakselia langs Sesselva til Sætre søndag 4. oktober.



I Sakselia fortalde Lars Sigmund Kleive om folket som har budd der gjennom tidene. Fleire andre hadde gode historier å supplere med om korleis livet på denne avsidesliggande garden kunne arte seg.

På vegen nedover langs elva hadde mellom andre Erling Sætre mykje å fortelje om Liafossen og om kvernene ved elva.Nede ved ”gamlevegbrua” fortalde Torill Staurseth Sætre meir om mølledrifta i Sesselva, og om sagbruka som har vore der.

Sjølv om regnet ”bøtta ned”, særleg under siste del av turen, var det ein vellykka dag, med godt utbytte både med tanke på trim og på ny og spanande kunnskap om ein del av lokalhistoria vår.
 

21. juni 2009                Sogelagstur til Brøstsaga i Lesja
Denne søndagen var Vestnes Sogelag på busstur til den gamle saga som lokalhistorie-entusiastar har bygd opp på Brøste. Vi fekk sjå både oppgangssag, sirkelsag, kvernhus og vadmålsstampe i aksjon, alt drive med vasskraft. Asmund Kylling, tidlegare lærar på Gjermundnes og ein av drivkreftene bak prosjektet, var guide. Han viste også andre interessante saker i området, m.a. Kyllingbrua og fossen på Verma. Les meir om saga her: http://www.lesja.kommune.no/FLIB/691-Brostad.pdf og her: http://www.lesja.kommune.no/FLIB/2029-Sagelva-plakat_fra%20Hanne.pdf.
 

29. mars 2009              Jakob Sletten i tonar og ord
Sletten-kvelden i Vestnes kyrkje denne søndagen vart ei fin markering i tonar og ord av minnet om sokneprest og salmekomponist Jakob Sletten. Kyrkja var på det næraste fullsett av interesserte tilhøyrarar, mellom dei seks etterkomarar etter Sletten.
Dei innsamla stoffet om Jakob Sletten vil bli grunnlag for ein artikkel om mannen og livsverket hans i Vestnes sogelag sitt årsskrift for 2009.
 

12. mars 2009              Årsmøte
Om lag 20 medlemmer var til stades på årsmøtet.
Årsmeldingar og rekneskap vart godkjende utan vesentlege merknader. Det vart påpeika at det nye styret må bli flinkare til å nytte nettstaden til informasjon og kontakt med medlemmene.Kontingenten blir uendra, kr 250 pr. år. Det nye styret vart: Per Bjørn Ellingseter, leiar, Knut Kjøpstad, Thor Olaf Helland, Lars Sigmund Kleive og Asbjørn Oterhals.

                                   
Per Bjørn Ellingseter

Etter årsmøtet var det foredrag av Åsmund Skålvik om malmutvinning og kolmiler i Vestnes. Her kan du lese det fullstendige referatet frå årsmøtet.

Desember 2008            Årsskrift 2008
Årskriftet vart presentert tidleg i desember. Skriftstyret trur årsskriftet er interessant for alle med tilknyting til Vestnes, både fastbuande og ikkje minst dei som har flytta ut. Medlemspris er kr 200, ordinær pris kr 250. Sjå reportasje frå pakkekvelden og presentasjon av årsskriftet i Romsdals Budstikke her.

13. november 2008      Denne torsdagen var det sogelagskveld på Daugstad. Om lag 30 unge og gamle møtte opp då leiar Lars Sigmund Kleive inviterte til å høyre om aktivitetar knytt til Sesselva opp gjennom tidene. Toril Staurset Sætre og Ingvald Vestnes fortalde.
Fyldig reportasje kan lesast i Vestnesavisa av 19.11.08.

3 desember 2007:        Årsskriftet for 2007 vart sendt ut til medlemane og er i sal i bokhandelen. Boka på 185 sider inneheld 27 lokalhistoriske artiklar og er som alltid rikt illustrert. Oversikta over artiklane finn du her på heimesidene. Boka er både fin julelesnad og julegåve (prisen er 250 kroner - 200 kroner for medlemar).

Bilete frå pakkedugnaden for utsending av Årsskriftet for 2007 (Foto Olav Hole, Vestnesavisa)

Olav Dahl har òg gjeve ut bok til jul. Ho heiter "Minne frå barne- og ungdomsår 1932-1950". Omtale i Romsdals Budstikke kan du lese her.

2. november 2007:       Denne fredagskvelden kl. 19 var det lokalhistorisk kveld på Tresfjord fleirbrukshus. Musikktradisjonen i og rundt Tresfjorden var tema. Omlag 25 personar møtte opp og fekk høyre Britt Elise Skram og Brit Guro Rypdal spele og Lars Sigund Kleive fortelje. Tresfjord har ein sjeldan rik spelemannstradisjon over 250 år bakover i tida. Skeidsvoll-boka er hovudkjelda for det vi veit i dag. Tresfjord bygdekvinnelag severte gode kaker og kaffi. Nok ein vellukka kveld!

Lars Sigmund Kleive, Britt Elise Skram
 og Brit Guro Rypdal (Foto JH)
 

12. juni 2007:              Det vart svært god oppslutning om den lokalhistoriske vandringa på Ytre Remmem.
Hovudføremålet med vandringa var å lokalisere dei gamle husmannsplassane på Ytre Remmen, men og komme innom andre kulturhistoriske tema. Omlag 30 personar møtte fram, sjølv om veret ikkje var det beste. Turen starta ved idrettshallen. Lokalkjent guide var Rønnaug Alvsåker. Ho veit utruleg mykje om Remmem i eldre tid, og denne kunnskapen formidla ho på ein framifrå måte til dei som var med. Ho inviterte endå til alle inn i det siste av "plasse-husa" som står att, på "Ivaplassen". (PBE)

Bileta er tatt av Terje Misund.
 

22. mars 2007:             Årsmøtet vart halde i kommunehuset, og 20 medlemar møtte fram. Leiar Alf Johan Hustad ønskte velkomen. Møtet med sine årsmeldingar vitna om eit svært aktivt år med fotoinnsamling, møter, turar, årsskrift og musikk-CD. Lars Sigmund Kleive vart vald til ny leiar i Sogelaget etter Alf Johan Hustad, som vart takka av etter fem år.

Sogelaget sin nye leiar,
Lars Sigmund Kleive (Foto JH)

I årsmøteprotollen les vi (TOH):

                         "Avtroppande leiar Alf Johan Hustad fortalte at han i dei 5 åra han hadde vore leiar, hadde trivdes med arbeidet og hadde gode erfaringar. Han ønskte det nye styret lukke til i arbeidet framover. 
Asbjørn Oterhals takka Alf Johan Hustad for det store og gode arbeidet han hadde utført i desse åra, og overleverte ein gavesjekk i den lokale bokhandelen. Alle frammøtte skreiv under på eit takkeskriv.

.... Etter kaffepausa  heldt Leo Oterhals eit kåseriet med tittel ”Kystfolk”. Denne delen av møtet var også åpen for dei som ikkje var medlemar av sogelaget, og det var nærare 40 tilhørarar i salen då Leo Oterhals fekk ordet. Han tok utgangspunkt i barndomen sin på Gossen. I kåseriet kom han mellom mykje anna inn på markante vestnesingar som Hans Haldorsen Bjermeland som busette seg på Gossen, Kristianna Rekdal som var barnepike hos søstra til tsaren  før og under revolusjonen i Russland, og Kjetil Rekdal som i 1998 sette inn vinnarmålet då Norge slo Brasil i fotball".

Leo Oterhals er ein engasjert og engasjerande forteljar (Foto JH)

11. desember 2006:     Sogelaget sitt årsskrift for 2006 er delt ut til medlemane og i salg i bokhandelen frå denne dagen. Skriftet vart presentert for pressa på kommunehuset. Redaktør og leiar i skriftstyret er Per Bjørn Ellingseter. Oversikt over innhaldet i boka finn du her. Her er m.a. artiklar om handelen i Vestnes del II og om pop og rock i kommunen frå 1961 (sjå artistregister her).
Samstundes vart sogelaget sin nye CD, "Bygdetradisjonar i ord og tonar III", presentert "laiv" ved Britt Elise Skram, Svein Oskar Smogeli og gruppa Werner Barth. Her er nyinnspelingar av tradisjonsmusikk med unge utøvarar frå distriktet vårt og intervju med musikarar som er meir tilårskomne (sjå register her). Britt Elise Skram har vore prosjektleiar og Trond Salthammer lydteknikar.

Nokre av dei som har vore med på årsskriftet og CD-en, frå venstre: Per Bjørn Ellingseter, Johan Hjelvik, Britt Elise Skram, Alf Johan Hustad og Jakob Kjersem. (Foto AJH/O.Hole)

7. desember 2006:       Sogelagsleiar Alf Johan Hustad var på biblioteket på Helland og fortalte om sogelagsarbeidet. Oppmøtet var beskjedent, men likevel vart det litt utveksling av opplysningar og det vart spela NRK-opptak frå 1939.
 

10. november 2006:     Denne kvelden var det lokalhistorisk kveld i kantina i Aktivitetssenteret på Helland  med biletkåseri ved Olav Skjegstad og Einar Baltzersen. Fleire av bileta kan du sjå under "Gamle bilete" på menyen til venstre.

Olav Skjegstad                                   Interesserte tilhøyrarar                         Einar Baltzersen

(Alle foto AJH)

Leiar Alf Johan Hustad skriv dette til dei som var med å lage arrangementet:

"Hjarteleg takk for ein triveleg fotokveld på Helland, det var slik eg hadde tenkt meg at kvelden skulle bli. 

Etter det eg fekk opplyst var der 65 personar tilstades (altså ca 1 bilete pr person) og det vitnar om stor interesse for temaet. Asbjørn O. frå sogelagsstyret gjekk nesten tom for tidlegare årsskrift og fekk teikna 9 nye medlemmer. Odd Jarle T. ordna med kaffi, og Karoline Utgård sette folk i stemning med nydeleg musikk. Det heile ledig leia av Olav S. og biletpresentasjonen elegant gjennomført av Einar B., medan Torgeir U. passa på at bileta kom på skjermen til rett tidspunkt. Jostein B. ordna med kjeks og bar stolar på harde livet for å få plass til alt folket, for å nemne litt om kvelden. God stemning altså, og publikum deltok ivrig med kommentarer. Trivelig var det også at fleire beboarar frå sjukeheimen var med. 

Og etterpå var det "fotoprat" der fleire hadde tatt med seg gamle bilete som dei fortalde om eller søkte opplysningar om. Jau, det var ei triveleg stund og eit vellukka arrangement. Tusen takk til alle som var med."

Eit motiv mange dreg kjensel på:
Ferjekøa på Helland ein gong på 60-talet.

20. august 2006:           Sogelagsturen gjekk i år går til Midsund. Johan Godø og Torfinn Bjørnerem fra Midsund Slekt- og Historielag var omvisarar. Ein omtrent fullsett buss besøkte dei tre øyane Dryna, Midøy og Otrøya. Franskehellaren, Varnesbrua, handelsplassen på Drynasundet, den gamle riksgrensa, Bjørneremshellarane og Opstadbua var mellom stoppestadane. På forsamlingshuset Fredheim fortalte Eli Rødberg og Målfrid Gangstad om ting historielaget har samla. Det var middag på Midsund Kro før besøket vart avslutta med ein tur Otrøya rundt. Sjå òg artikkel i Vestnesavisa 23. august.

Brua over Drynasundet (Midøy-Otrøy)                    Karsten og Jostein Kirkeslett framfor

vart bygd i 1904 og er seinare restaurert.          Opstadbua der dei budde nokre år i oppveksten
 

Bileta viser vegen opp til Bjørneremshellarane og opninga til den største av dei
 

Orientering om Opstadbua (Alle foto: AJH)
 

7. juni 2006:                 Sogelaget besøkte Tresfjord Museum denne kvelden. Det var ope for alle og omlag 30 personar møtte fram. Olav Dahl orienterte og viste dei besøkande rundt. Arnljot Løvik og Alf Johan Hustad held òg innlegg. Besøket vart avslutta med servering på løa og musikk ved Toradergruppa. Ein vellukka kveld!

Bilete frå sogelagsbesøket på Tresfjord Museum 7. juni 2006 (Foto JH)
 

23. mars 2006:             Årsmøte i sogelaget på kommunehuset i Vestnes. Godt oppmøte både på årsmøtet og etterpå, då Astor Furseth kåserte om rovdyr og jakt i eldre tider. Han har skreve bok om emnet. Denne delen av møtet var ope for alle.

Foredrag om bjørn og ulv ved Astor Furseth etter årsmøtet 23. mars (Foto JH)
 

28. januar 2006:           Sogelaget v/fotogruppa hadde innsamling av gamle bilete frå Vestnes/Helland/Remmembukt-området. Det møtte 8 personar med gode samlingar av bilete og det vart avfotografert eller skanna i overkant av 100 bilete.

Elisabeth Sønstadbø med gamle foto frå Helland under innsamlinga 28. januar i år (Foto AJH)

26. oktober 2005.        Sogelaget presenterte sangheftet ”Salmer og Sange fra Tresfjord” i ei sanggudsteneste i ei fullsett Tresfjord kyrkje. Heftet inneheld eit utval av salmar og religiøse songar av dei to tresfjordingane Anna Nilsdatter Stavem og Søren Hoem Øvstedal. Kåre Lislien har omsett salmane frå gotisk og gjort mindre språklege endringar, Henry Vike har funne fram til melodiane og Jakob Kjersem har leia arbeidet. 

12. september 2005.    Kulturminnedagen. Tema ”Frå slegge til mus”. Eit samarbeid med Vestnes kommune og Skorgen Vel. Vi såg på dei gamle bruene i Skorgen. Etterpå var det samling på Frivillighetssentralen her det m.a. var kåseri av Thor Olaf Helland om opplysningar frå handelskalenderen i Vestnes år 1944. Til slutt besøkte vi Båtbyggarmuseet si utstilling i løa på Frivillighetsentralen.

21. august 2005.           Sogelaget hadde tur til Veøya, med omvising på øya, i kyrkja og i prestegarden. Omvisar var Terje Thingvold. Reisa fram og tilbake gjekk med m/s ”Auno”. I det vakre veret var det ein strålande tur. 25 personar var med.

22. juni 2005.               Sogelaget arrangerte omvising i det tyske kystbatteriet på Øygarden, Rekdal; ”Stützpunkt Rekdal”. Omvisar var Roger Aakernes med god hjelp av Asbjørn Oterhals. Her deltok ca 50 personar.

19. april 2005.              Lokalhistorisk kveld i Fiksdal med tema ”Å slå forsyn”. Dette var ein heimeindustri i Fiksdal frå mellomkrigstida og fram til ca 1960. Det var song av Fiksdal mannskor, Ernst Nakken demonstrerte bruk av forsynmaskiner og Bjørn Austigard kåserte. Det heile leia på ein stødig måte av Fiksdal Vel v/Marino Nakken. Arrangementet var på ”Bygdaheim” i Fiksdal og salen var full av folk.

7. mars 2005.               Årsmøte. Forfattar Ole M. Ellefsen fortalde om ”Brudeferden” , då livbåten ”Uræd” kryssa Atlanterhavet i 1905. Her var det med 2 mann frå Vestnes.

12. september 2004.    Kulturminnedagen. Tema ”Frå hjell til gryte”. Sogelaget tok del saman med Vestnes kommune, Frivillighetssentralen o.fl. i ei tilstelling på Gjermundnes.

August 2004                 ”Den store hesteferda”. Sogelaget deltok med tilrettelegging og deltaking kring filmopptaka i tresfjordområdet. Kontaktmann var Jakob Kjersem.

22. august 2004.           Tur til Gossen, Aukra, med omvising på øya og besøk på Krigsminnemuseet og ved Roktamonumentet og i kyrkja. Rektor Knut Rød var ein spirituell og engasjert omvisar med store kunnskapar om lokalhistoria til denne øya. Det er mykje kontakt mellom Aukra og Vestnes. Under krigen var i alt 56 gossingar evakuert frå Aukra til Vestnes fordi  tyskerane rekvirerte hus og heim og der var bygging av festningsverk og flyplass.

24. mai 2004                Gravrøysvandring på Vike. Fylkesarkeolog Jan Aakvik var guide og viste rundt, fortalde og orienterte om dei store samlingane av gravrøyser i Bakneset og Leikarneset. Det deltok ca 20 personar. Etter omvisinga var det kaffi på Landbruksmuseet der vi også fekk sjå utstillinga ”Emnetre”.

31. mars 2004              Lokalhistorisk kveld i Tomrefjord, med tema ”Konfeksjonsindustrien”. Kvelden var eit samarbeid med Romsdal sogelag og konfeksjonsmuseet i Isfjorden. Her var intervju med konfeksjonsarbeiderar, bilde frå konfeksjonsindustrien og avsspeling av eit intervju som NRK hadde hatt med konfeksjonssyersker i 1938. I tillegg også kåseri av Bjørn Austigard, som fortalde om ”Vadmel og stamping”.

                                    Arrangementet var på Tomrefjord skule og det var møtt fram ca 100 personar.

18. mars 2004.             Årsmøte. Avspeling av eit lydopptak gjort av NRK v/Hartvig Kiran i 1938, der han m.a. intervjuar handelsmann Peder Fiksdal, kaptein Nils Øveraas, ordførar og båtbyggar Einar Helland og båtbyggar Iver Løvik.

2. oktober 2003.          Soglaget presenterte ”Bygdetradisjonar i ord og tonar II”, ein CD med musikk og verbale innslag frå Vestnes. Tyngda av dei som er med på den 34 spors CD-en er mellom 50 – 80 år gamle. Henry Vike har administrert og redigert det heile.

14. september 2003.    Sogelaget deltok i markering av kulturminnedagen. Tema: Vår medisinske kulturarv. Tilstellinga vr i festsalen ved Vestnes Trygdeheim. Her var m.a. ei lita utstilling og lege Torstein Tjelle fortalde frå si lange tenestetid som lege i Vestnes.

30. august 2003.           Sogelaget deltok ved opning av Sjøhallen ved Aker Langsten as.

22. juni 2003.               Tur til Fjørtofta med omvising på øya og besøk i kyrkja som vestnesingen, kyrkjebyggar Knut L. Stokkeland, sette opp i 1870-åra.. Palmer Fjørtoft var ein engasjert og kunnskapssrik guide. Det tok del 25 personar.

9. april 2003.                Kveldskurs om ”Data i slektsgransking”. Kurset var i samarbeid med DIS Vestnes.

26. mars 2003.             Årsmøte. Framvising av gamle postkort frå Vestnes.

Desember 2002.           Pressekonferanse ved framlegging av årsskriftet.

8. september 2002.      Sogelaget tok del i markering av kulturminnedagen, med ei tilstelling på Frivillighetssentralen, Vestnes. Tema var skulen i gamle dagar.

16. juni 2002.               ”Frå gudshus til garveri”. Sogelaget hadde tur til Ørsta for å sjå på ”Bruksbutikken”. Dette huset som vart kåra som tusenårstad i Ørsta, er bygd opp med materialer frå den gamle kyrkja i Vestnes som vart riven i 1872. Bygget var mykje til nedfalls.

                                    Etterpå var det omvisning i den gamle delen av Ørsta sentrum med Gunnar Ellingsen som guide, og deretter gikk turen til Ivar Aasen-museet der vi fekk sjå oss om og Jens Kåre Engeset fortalde om Ivar Asen og Anders Hovden. Vi besøkte også fødestaden til Anders Hovden, før vi etter ein lang dag tok bussen tilbake til Vestnes.

21. mars 2002.             Årsmøte. Framvising av båtbyggarfilmen frå Vestnes.